الكلاب والأطفال
ميخائيل عيد - سورية

 

ضعيف كتير كان
وكان حافي ..
وبكومة زبل
عم تبحبش عيونو
علقمة خبز
بلكي ..
يخف جوعو
وعخدو تكرج
بحسره دموعو.
***
تلات سنين عمرو
وكان حافي ..
تيابو مخزقة
موسخ جبينو ..
وطلت ست مغروره بشبابا
غنية كتير
باين من تيابا
عالي كعبها ..
وعالي جبينا ..
رسن كلبا المدلل
في يمينا ..
***
الكلب قرب عالصبي ..
بلش يشمو
فزع منو الصبي..
استنجد بأمو
***
جفل منو الكلب
صرخت: يا ويلي
زعجت "ميدور"
ييه ..
تضرب نشالله..
وبصقت عالارض..
تضرب نشالله
ومشت متكبره
الكبره لالله
***
انحنى عالمزبلة
وبلش يتمتم
لقي..
قلب المزبلة
كتير أرحم
ألف مرة
كتير أرحم
من قلوب الاغنيا ..
***
إيــــــه
صار يفهم

 

لا يوجد تعليقات حتى الآن